ကွမ်းပင်မျိုးယူရာတွင် ရွေးချယ်ရမည့်အချက်များ

 

ကွမ်းသည်ဆေးဖက်ဝင်ရုံသာမက ဘာသာရေးပွဲများ၊ အထင်ကရပွဲများတွင်လည်း မပါမဖြစ်အသုံးပြုရသောအရွက်ဖြစ်ပါသည်။ ထို့ပြင်သရေစာကဲ့သို့ပင် ရှေးယခင်မြန်မာဘုရင်များလက်ထက်က စားသုံးခဲ့သောကွမ်းသည် မြန်မာနိုင်ငံတွင် လွန်စွာစီးပွားရေးအရအရေးပါသော အရွက်တစ်မျိုးအဖြစ်ရပ်တည်နေပါသည်။ ယနေ့ခေတ်တွင် ကွမ်းတစ်ပိဿာလျှင် ၃၀၀၀ကျပ်မှ၆၀၀၀ကျပ်အထိ ပေါက်ဈေးရှိပါသည်။ ပေါက်ဈေးသည် ကွမ်း၏အရည်အသွေးပေါ်မူတည်၍ အပြောင်းအလဲရှိပါသည်။ ထို့ကြောင့်အရည်အသွေးကောင်းသောကွမ်းမျိုးများရရှိရန် မျိုးကိုမှန်ကန်စွာရွေးချယ်တတ်ရန်လိုအပ်ပါသည်။ကွမ်းမျိုးယူရာတွင် ထိပ်မျိုးညွန့်များ (သို့) ၃၀-၄၀စင်တီမီတာခန့်ရှိသောမျိုးဆစ်ပိုင်းများကိုအသုံးပြုရပါသည်။ ထိပ်ဘက်မှယူသောမျိုးညွန့်များသည် အမြစ်ထွက်လွယ်သောကြောင့် မျိုးယူရန်ပိုမိုသင့်တော်ပါသည်။

ကွမ်းမျိုးယူရာတွင် အောက်ပါအချက်အလက်များကိုကြည့်ပြီးရွေးချယ်ရပါမည်။

- မိမိစိုက်ပျိုးမည့်ကွမ်းအမျိုးအစား

- မိခင်ခြံ၏သက်တမ်း

- မိခင်ခြံ၏ရောဂါပိုးမွှားကျရောက်မှုအခြေအနေ

- မိခင်ခြံ၏မြေသားဖွဲ့စည်းတည်ဆောက်ပုံ

- မိခင်ခြံ၏မှတ်တမ်း

- မိခင်ခြံ၏စိုက်ပျိုးပြုစုမှုပုံစံ

စိုက်ပျိုးမည့်ကွမ်းအမျိုးအစား

     မြန်မာနိုင်ငံတွင်အစိုက်များသောကွမ်းမျိုးများမှာ ကွမ်းနုဝါ၊ ထွက်တိုးကွမ်းနုဝါ၊ ကွမ်းစိမ်း၊ ထိုကွမ်း၊ထိုင်ဝမ်ကွမ်း၊ ရိုးစန်း၊ ရိုးဝါ၊ ကျောက်စိမ်းရွက်ချွန်၊ ရွှေဒါး စသည်တို့ဖြစ်ပါသည်။ ထိုထဲတွင်လူကြိုက်များသောကွမ်းမျိုးဖြစ်သောကွမ်းနုဝါမျိုးသည် စိုက်ပျိုးရန်အသင့်တော်ဆုံးဖြစ်ပါသည်။ မိမိတင်ပို့မည့်နေရာအပေါ်မူတည်၍လည်း ရွေးချယ်တတ်ရန်လိုအပ်ပါသည်။ ဥပမာပြောရလျှင် ကျွန်ုပ်တို့အောက်မြန်မာတွင် အစားများသောကွမ်းမှာ ကွမ်းစိမ်းဖြစ်ပါသည်။ ဤသို့သောအရပ်မျိုးတွင်မူ စားသုံးမှုနှုန်းအပေါ်မူတည်၍ ကွမ်းမျိုးကိုရွေးချယ်ရမည်ဖြစ်ပါသည်။ စလင်းကိုင်းအထွက်များပြီး အမြစ်ထွက်အားကောင်းသောမျိုးကိုစိုက်ပျိုးပါက ပိုမိုကောင်းမွန်ပါသည်။

မိခင်ခြံ၏သက်တမ်း

     မိမိမျိုးယူမည့်ခြံ၏သက်တမ်းမှာ သုံးနှစ်သက်တမ်းထက်မကျော်သော ခြံဖြစ်ရပါမည်။ ရောဂါကျရောက်မှုမရှိသော မျိုးသန့်ထုတ်သောခြံဖြစ်ရပါမည်။ မိခင်ခြံ၏သက်တမ်းမှာ တစ်နှစ်ထက်မကျော်ပါက စိုက်ပျိုးပြီးမကြာမီဖြစ်ထွန်းအောင်မြင်ပါသည်။ သုံးနှစ်သက်တမ်းရှိ ခြံမှ စိုက်ပျိုးပါကမူ ဖြစ်ထွန်းရန်နှောင့်နှေးတတ်သော်လည်း ရောဂါခံနိုင်စွမ်း မြင့်မားတတ်ပါသည်။

မိခင်ခြံတွင်ရောဂါပိုးမွှားကျရောက်မှုအခြေအနေ

   မိခင်ခြံတွင် ရောဂါကျရောက်မှုရှိမရှိသည် လွန်စွာအရေးကြီးပါသည်။ ရောဂါကျရောက်မှုမရှိဖူးသောမျိုးသန့်ထုတ်ခြံဖြစ်ပါက အကောင်းဆုံးဖြစ်ပါသည်။ ကွမ်းတွင်အကျများသောရောဂါများဖြစ်သော ဆီစွန်းရောဂါများ၊ ရိုးမဲဆစ်ပြုတ်ရောဂါများ၊ ဒေါင်းနှီးရောဂါများ၊ ရောင်မညီကွက်ကျားရောဂါများ မိခင်ခြံတွင်ကျ‌ရောက်မှုရှိ၊ မရှိစစ်ဆေးရပါမည်။ ၎င်းရောဂါများကျရောက်မှုကင်းရှင်းမှသာလျှင် မျိုးညွန့်အတွက်ရွေးချယ်ဝယ်ယူရပါမည်။

မိခင်ခြံ၏မြေသားဖွဲ့စည်းတည်ဆောက်မှုပုံစံ

      မြေသားဖွဲ့စည်းတည်ဆောက်မှုပုံစံအပေါ်မူတည်ပြီး အရည်အသွေးကွာခြားသွားတတ်ပါသည်။ မိမိစိုက်ပျိုးမည့်ခြံသည် မိခင်ခြံ၏မြေသားဖွဲ့စည်းမှုထက်ယုတ်လျော့ပါက အရည်အသွေးကျဆင်းသွားမည်ဖြစ်ပါသည်။ ထို့ကြောင့် မိခင်ခြံ၏မြေသားမျိုးကဲ့သို့ရအောင် ပြင်ဆင်စိုက်ပျိုးပါမှ အရည်အသွေးပြည့်မီသောကွမ်းများကိုရမည်ဖြစ်ပါသည်။

မိခင်ခြံ၏မှတ်တမ်း

       မိခင်ခြံ၏မှတ်တမ်းဆိုသည်မှာ စိုက်ပျိုးသည့်သက်တမ်းတစ်လျှောက် ကွမ်းပင်များတွင်ဖြစ်ပျက်တတ်သောအကြောင်းအရာများကို ဆိုလိုခြင်းဖြစ်ပါသည်။

မိခင်ခြံ၏စိုက်ပျိုးပြုစုမှုပုံစံ

       မိခင်ခြံ၏စိုက်ပျိုးပြုစုမှုပုံစံကိုကြည့်ရှုပြီး ယင်းပုံစံထက်မလျော့အောင် စိုက်ပျိုးနိုင်မှသာ မိခင်၏ဗီဇအရည်အသွေးပြည့်မီသော သားချင်းများကိုရရှိမည်ဖြစ်ပါသည်။

       အထက်ပါအချက်အလက်များကိုကြည့်ရှုပြီး ကွမ်းမျိုးယူမှသာလျှင် လူကြိုက်များကောင်းမွန်သောကွမ်းများကိုရရှိမည်ဖြစ်ပါသည်။
Credit-GreenWay
#တောင်သူဦးကြီး_T

aungThuOoGyi