" မြေသြဇာကျွေးလျှင် ဤသို့ကျွေးပါ "
(1) စိုက်ပျိုးထားသော သစ်ပင်အတွက် သင့်လျော်သော မြေသြဇာမျိုးကို ရွေးချယ်ပြီးနောက် သင့်လျော်သောအချိန် ကျွေးရမည်ဖြစ်ပါသည်။
(2) တိရစ္ဆာန်ချေးများအား အမိုးအကာနှင့် ကျနစွာသိမ်းထား ရပေမည်။ နေပူ မိုးရွာတွင် ပစ်မထားရပါ။ မြေသြဇာပုံကို မြေဖြင့်ဖုံးထားပါက အကောင်းဆုံးဖြစ်ပါသည်။
(3) မြေသြဇာများကို တစ်ခါတည်းများများ သုံးသည်ထက် မကြာမကြာ နည်းနည်းသုံးခြင်းက ပို၍ကောင်းသည်။ ပိုစိတ်ချရပါသည်။
(4) မပုပ်ဆွေးသေးသော တိရစ္ဆာန်ချေး သဘာဝမြေသြဇာ များသည် အပူလောင်စေသောဟသတ္တိရှိသဖြင့် ၄င်းတို့ကို လပ်လပ်ဆပ်ဆပ် မကျွေးရပါ။
(5) အရည်ပျော်လွယ်သော ဓာတ်မြေသြဇာများကို မိုးများသော ဒေသများ မိုးရာသီတွင်မကျွေးပဲ မိုးကုန်မှ ကျွေးခြင်းက ပိုမိုထိရောက်ပါမည်။
(6) မြေသြဇာများကို တစ်ခုနှင့်တစ်ခု အရမ်းရောနှောခြင်း မပြုပါနှင့်။ ဥပမာ- ထုံးနှင့် နိုက်ထရိုဂျင်ပါသော မြေသြဇာများကို ရောနှောလျှင် နိုက်ထရိုဂျင်သည် အာမိုနီးယားဓာတ်ငွေ့ဖြစ်၍ လေထဲသို့လွှင့်ပါသွားသဖြင့် ဆုံးရှုံး၏။
(7) ဓာတ်မြေသြဇာများသုံးသည့်အခါ ရေကိုများများ လောင်းပေးပါ။
(8) ဓာတ်မြေသြဇာများကို သစ်ပင်၏အမြစ်များနှင့် တိုက်ရိုက်မထိတွေ့စေရပါ။
(9) ဓာတ်မြေသြဇာများကိုသုံးလျှင် သဘာဝမြေသြဇာများ ကိုလည်းသုံးရပါမည်။
(10) ရွှေ့စိုက်ခါစ သစ်ပင်ပန်းပင်များကို မည်သည့်အခါမျှ မြေသြဇာမကျွေးရ။ သစ်ပင်များအရွက် အခက် စည်လာမှ မြေသြဇာကို နည်းနည်းနှင့် တစ တစ ကျွေးရမည်။
(11) မြေသြဇာအရည်များကို ချိနဲ့နေသော အပင်များအား မလောင်းရပါ။
(12) ပန်းအိုးနှင့်စိုက်သောအပင်များအတွက် သစ်ဆွေးမြေ အလွနါအကျွံ မထည့်ရပါ။ ရောဂါရလွယ်တတ်ပါသည်။ ခဏတာ သန်စွမ်းပြီး ချိနဲ့သွားတတ်ပါသည်။
(13) မြေသြဇာအရည်ကို ကျွေးရန်ကောင်းဆုံးအချိန်သည်
* ပန်းပင်ဖြစ်လျှင် ပွင့်ဖူးဝင်စအချိန်ဖြစ်ပါသည်။
* စားသုံးသစ်သီးပင်များဖြစ်လျင် သီးကင်းဝင်စမှ အသီးရင့်ချိန်အထိ တပတ်လျှင် တစ်ကြိမ်ဖြစ်ပါသည်။
* ဟင်းသီးဟင်းရွက်ဖြစ်လျှင် ကြီးထးသန်စွမ်းချိန်ဖြစ်၏။
* အိုးနှင့်စိုက်သောအပင်များတွင် အိုးအတွင်းအမြစ်များ ပြည့်သောအချိန်ဖြစ်ပါသည်။
(14) မြေသြဇာကို သစ်ပင်အရင်းတွင် မည်သည့်အခါမျှ မကျွေးရပါ။ အိုးနှင့်စိုက်လျှင် အိုးနှုတ်ခမ်း၌၊ မြေမှာစိုက်လျှင် သစ်ပင်အကြီးအငယ်ကိုလိုက်၍ သစ်ပင်ခြေနှင့် ဝေးဝေး ကျွေးရပေမည်။ သစ်ပင်များဖြစ်လျှင် အပင်ရင်းမှ (4-5)ပေ ခွာပြီးကျွေးရပေမည်။
ဦးအောင်သိန်း၊ ဥယျာဉ်စိုက်ပျိုးခြင်းပညာ
Comments
Post a Comment