မြေကို အနားပေးမလား(သို့) မြေ အားနေချိန်လေး အားဖြည့်ပေးမလား?
စိုက်ပျိုးရေးလုပ်ငန်းလုပ်ကိုင်သူအများစု ကြုံ ဖူးကြလိမ့်မယ်လို့ထင်ပါတယ်။ ဒေသတော်တော်များများမှာ မိမိစိုက်ပျိုးမြေမှာ ရာသီအလိုက် သီးနှံတွေအလှည့်ကျစိုက်ရင်း မြေကို အနားပေးရမယ့်အချိန်မရှိတာမျိုး ၊ မြေကို အားပြန်ဖြည့်ဖို့ ကြိုးစားချိန်မရဘဲ မြေမှာ ဆက်တိုက်စိုက်ပျိုးနေရတာမျိုးတွေ၊ ပြီးတော့ ရေမရလို့ သီးနှံစိုက်ပျိုးမှုမလုပ်နိုင်ဘဲ မြေကို အနားပေးထားရတဲ့ အချိန်မှာ မြေကို ဘယ်လိုပုံစံအနားပေးထားရမှန်းမသိ အားပြန်ဖြည့်ရင် လှပ်ထားရမှန်းမသိတဲ့ အခြေအနေလေးတွေပါ ။အခု မျှဝေပေးသွားချင်တာကတော့ မိမိစိုက်ပျိုးမြေကို ဘာကြောင့် အနားပေးသင့်သလဲ ၊ အားပြန်ဖြည့်ပေးသင့်သလဲ ၊ သဘာဝနည်းအတိုင်းကုန်ကျစရိတ်နည်းနည်းနဲ့ထိထိရောက်ရောက် ဘယ်လို မြေကို အားပြန်ဖြည့်မလဲ ဆိုတဲ့အကြောင်းလေးကိုမျှဝေပေးသွားပါ့မယ်။
စိုက်ပျိုးမြေမှာ ရာသီမလပ် ဆက်တိုက်စိုက်ပျိုးရေးလုပ်ကိုင်လာရင်းနဲ့ မူလစိုက်ပျိုးမြေအတွင်း ရှိတဲ့ ဓာတ်ပါဝင်မှု အနည်းအများ မညီမမျှဖြစ်လာတာမျိုးတွေ ၊ စက်ကြီးနဲ့ ထွန်ယက်စိုက်ပျိုးလာရင်း မြေရဲ့ရုပ်ပိုင်းဆိုင်ရာ ပြောင်းလဲ ပျက်စီးလာတာ မျိုးတွေ ဖြစ်လာပါတယ်။ ဒါကြောင့်မြေကို အနားပေးသင့် အားပြန်ဖြည့်ပေးသင့်ပါတယ် ။ မိမိစိုက်ပျိုးချိန်မှာ အသုံးပြုတဲ့ ဓာတ်မြေသြဇာတွေဟာ စိုက်ပျိုးမြေအတွက် အာဟာရမဖြည့်ပေးနိုင်ပါဘူး သီးနှံပင်အတွက် ပဲ ရေတို ကောင်းကျိုးပေးနိုင်တာပဲ ဖြစ်ပါတယ်။ ဒါကြောင့် မိမိမြေကို သဘာဝနည်းအတိုင်း ကုန်ကျစရိတ်သက်သက်သာသာ နဲ့ မြေပြုပြင် ထိန်းသိမ်းရန် အားပြန်ဖြည့် ပေးရန်လိုအပ်တာပဲ ဖြစ်ပါတယ်။
အပြောများပြီး အသုံးပြုမှုနည်းနေကြ တဲ့ နည်းလမ်းကတော့ သစ်စိမ်းမြေသြဇာ အသုံးပြုပေးခြင်းဖြစ်ပါတယ် ။ သစ်စိမ်းမြေသြဇာ ဆိုတာကတော့ မိမိမြေမှာ အပင်တွေ ပက်ကြဲစိုက်ပျိုးထားပြီး ထိုအပင်တွေ အသီး အပွင့် မဝင်ခင်လေးမှာ ထယ်မှောက်လိုက်ပြီး မြေထဲမှာတင် အဆွေးခံခြင်းပဲဖြစ်ပါတယ်။ သစ်စိမ်းမြေသြဇာအဖြစ်အသုံးပြုနိုင်တဲ့ အပင်တွေကတော့ ပဲအမျိုးမျိုး၊ ညံပင်၊ ပိုက်ဆံလျှော်၊ ဘောစကိုင်း တို့ပဲဖြစ်ပါတယ်။ ရေနှင့်နီးတဲ့ဒေသတွေမှာတော့ ဗေဒါပင်နှင့် ရေမှော်တွေကို သစ်စိမ်းမြေသြဇာအဖြစ်အသုံးပြုနိုင်ပါတယ်။ သစ်စိမ်းမြေသြဇာပြုလုပ်မည့် အကိုင်း၊ အခက်၊ အရွက်နှင့် အမြစ်များသည် မြေအောက်သို့ နှစ်မြှပ်ခံရပြီးနောက် ဘက်တီးရီးယားအကူအညီဖြင့် ဆွေးမြေ့ကြရပါတယ်။ ထိုအခါ နိုက်ထရိုဂျင် ဓါတ်ကြွယ်ဝသည့် သစ်စိမ်းမြေသြဇာ အာနိသင်ကို ရရှိပါတယ်။ တစ်ကြိမ် ထည့်ထားလျှင် ၂ နှစ်အထိ ဆက်လက်၍ အာနိသင်ရှိပါတယ်။ သစ်စိမ်း ၁ တန် အသုံးပြုတိုင်း သစ်ဆွေးဓါတ် (၁/၄) တန် ရရှိနိုင်တယ်။ နိုက်ထရိုဂျင်နှင့် အခြားအာဟာရဓာတ်များရရှိနိုင်ရုံသာမက မြေအနေအထားကို ပွလာစေနိုင်တဲ့ အကျိုးကျေးဇူးလဲရရှိမှာဖြစ်ပါတယ်။ ဒါကြောင့် မိမိ မြေအတွက် အားပြန်ဖြည့်ရန် (သို့) သီးနှံ တစ်ရာသီလုံးစာ ရေရရှိနိုင်မှုမရှိ၍ သီးနှံစိုက်ပျိုးရန်အဆင်မပြေဘဲ ခနတဖြုတ် မြေလပ်နေမယ့်အချိန်တွေမှာ ကုန်ကျစရိတ်နည်းပါးပြီး အကျိုးကျေးဇူးများစွာရရှိနိုင်တဲ့ သစ်စိမ်းမြေဆွေးအတွက် အပင်များစိုက်ပျိုးကာ မြေဆွေးပြုလုပ်ထားခြင်းဖြင့် မိမိမြေအရည်အသွေးကိုမြင့်တင်လို့ရနိုင်ပါကြောင်း မျှဝေလိုက်ရပါတယ်။
မူရင်း-တောင်သူ့တံတား
Comments
Post a Comment