စပါးအထွက်မြင့်မားရေးနှင့် နိုက်ထရိုဂျင်မြေသြဇာ

 

စပါးအထွက်မြင့်မားရေးနှင့် နိုက်ထရိုဂျင်မြေသြဇာ
-----------------------------------

နိုက်ထရိုဂျင်သည် စပါးပင်ကြီးထွားဖွံ့ဖြိုးရေးအတွက် မရှိမဖြစ်လိုအပ်သော အာဟာရဓာတ်ဖြစ်သည်။ နိုက်ထရိုဂျင်သဘောသဘာဝအရ လေလွင့်ဆုံးရှုံးနိုင်သည်။
တစ်ကြိမ်တည်းကျွေးပေးရုံဖြင့် မလုံလောက်၊မြေသြဇာ၏အကျိုးအာနိသင် အပြည့်အဝကို ရရှိစေရန် အကြိမ်ကြိမ်လီ၍ ခွဲဝေကျွေးပေးပါ။ သက်လျင်အထွက်ကောင်း စပါးမျိုးများတွင် သုံးကြိမ်၊ သက်လတ်အထွက်ကောင်းစပါးမျိုးများတွင်မူ လေးကြိမ်လီ၍ကျွေးပေးပါ အဲဒီလိုရေးခဲ့ပါသည်။

မိတ်ဆွေလယ်သမားကြီးတစ်ဦးကကျွန်တော့်ကိုမေးလာသည်။စပါးစိုက်ခင်းကို တစ်ကြိမ်တည်းနိုက်ထရိုဂျင်မြေသြဇာ ကျွေးမယ်ဆိုရင် ဘယ်အချိန်ကျွေးရမှာလဲ၊ နှစ်ကြိမ်ဆိုလျှင်ဘယ်အချိန်တွေ ကျွေးရမှာလဲဖြစ်နိုင်ပါသည်။ အချို့သောတောင်သူလယ်သမားကြီးများ အတွက် စပါးစိုက်ခင်းတိုင်းကို သုံးကြိမ်၊ လေးကြိမ် အခါခါသွားပြီး မြေသြဇာကျွေးဖို့ဆိုတာ တကူးတကကြိုးစားရပါလိမ့်မည်။ ဒါ့ကြောင့် ဤမေးခွန်းကိုမေးလာခြင်း ဖြစ်နိုင်ပါသည်။

နိုက်ထရိုဂျင်မြေသြဇာဆိုတာ လေလွင့်ဆုံးရှုံးနိုင်တာဖြစ်လို့ တစ်ကြိမ်တည်းကျွေးခြင်းကို ကျွန်တော်မထောက်ခံလိုပါ။နှစ်ကြိမ်ကျွေးခြင်းကိုတော့ ထောက်ခံပါမည်။ သို့သော် ဘယ်အချိန်ကျွေးရမှာလဲဆိုတာကိုတော့ ဆုံးဖြတ်နိုင်ဖို့လိုပါသည်။ မှန်ကန်သောဆုံးဖြတ်မှုပြုနိုင်ရန် ရှေးဦးစွာ အလွန်အရေးပါသော စပါးပင်၏ ကြီးထွားမှုအဆင့်တွေကို နားလည်သိရှိဖို့လိုသည်။ စပါးပင်ကြီးထွားမှုအဆင့်ဆင့်ဖြစ်ပေါ်တာကို ကာလသုံးခု ပိုင်းခြားနိုင်သည်။

(၁) ပင်ပိုင်းကြီးထွားသည့်ကာလ၊

(၂) မျိုးပွားပိုင်းကြီးထွားသည့်ကာလနှင့်

(၃) ရင့်မှည့်သည့်ကာလတို့ ဖြစ်ပါသည်။

ပင်ပိုင်းကြီးထွားသည့်ကာလသည်အပင်ပွားခြင်းအတွက် အရေးပါသောကာလဖြစ်သည်။ ထိုကာလတွင် အပင်ပွားစီးသည့်အဆင့်ပါဝင်လို့ ဖြစ်သည်။ အပင်ပွားများမှစပါးနှံအရေအတွက် များပါမည်။မျိုးပွားပိုင်းကြီးထွားသည့် ကာလသည် စပါးနှံအတွက် အရေးပါသောကာလဖြစ်သည်။ ထိုကာလတွင် အနှံသန္ဓေစတင်ဖြစ်ပေါ်သည်မှ ဖုံးတုန်းလုံးတုန်းဖြစ်ခြင်း၊စပါးနှံထွက်ခြင်း၊ ပန်းပွင့်ခြင်း စသည့်အဆင့်တွေ ပါဝင်လို့ဖြစ်သည်။ စပါးနှံတွင်စပါးစေ့အရေအတွက်များမှသာ စပါးအထွက်ကောင်းနိုင်မည် ဖြစ်ပါသည်။

သို့ဖြစ်၍ နိုက်ထရိုဂျင်မြေသြဇာကျွေးရေး ကျွန်တော်ထောက်ခံလိုသည့် နှစ်ကြိမ်
မှာ စပါးပင်၏ အပင်ပွားစီးသည့်အဆင့်တွင် တစ်ကြိမ်နှင့် အနှံသန္ဓေစတင်ဖြစ်ပေါ်
သည့်အချိန်တွင်တစ်ကြိမ် ဖြစ်ပါသည်။အပင်ပွားစီးသည့်အဆင့်မှာ စပါး
ပင်သည် လျင်မြန်စွာကြီးထွားလေ့ရှိသည်။ပြီးတော့ ပင်ပွားတွေကို စတင်ဖြစ်ပေါ်ပါသည်။ အဲဒီပင်ပွားတွေကနေ အနှံတွေဖြစ်ပေါ်လာရတာဖြစ်သည်။ ဒီအဆင့်မှာ စပါးပင်က အာဟာရတွေကို ပိုမိုလျင်မြန်စွာ ရယူလေ့ရှိသည်။ ဒါ့ကြောင့် လုံလောက်သည့်နိုက်ထရိုဂျင်အာဟာရကို ကျွေးပေးဖို့လိုသည်။

စပါးအထွက်ကောင်းဖို့အတွက်လုံလောက်သည့်ပင်ပွားတွေကို ဖြစ်ထွန်းပေးနိုင်အောင်လို့ဖြစ်ပါသည်။မိတ်ဆွေလယ်သမားကြီးတစ်ဦးကမေးဖူးပါသည်။အပင်ပွားစီးသည့်အဆင့်ကို ဘယ်လိုသိနိုင်မှာလဲမေးမြန်းမှုအပေါ် အပင်ပွားစီးသည့်အဆင့် ဖြစ်ပေါ်သည့်ရက်ကို အသိပေးလိုက်ပါသည်။ နိုက်ထရိုဂျင်မြေသြဇာ ကျွေးသင့်သည့်ရက်မှာ ထိုရက်ဖြစ်ပါသည်။
ပျိုးထောင်ကောက်စိုက်စပါးမှာဆိုလျှင် ကောက်စိုက်ပြီး ၂၄ ရက်ကနေ ရက် ၃၀ ဝန်းကျင် ဖြစ်ပါတယ်}}

တိုက်ရိုက်မျိုးစေ့ချ စိုက်ခင်းတွေမှာဆိုရင်လည်း မျိုးစေ့ချပြီး သို့မဟုတ် ကြဲပက်စိုက်ပြီး ၂၄ ရက်ကနေ ရက် ၃၀ ဝန်းကျင်ပဲ ဖြစ်ပါတယ်ပထမအကြိမ်အနေဖြင့် စပါးစိုက်ခင်းကို နိုက်ထရိုဂျင်မြေသြဇာကျွေးပေးရန် ဖြစ်ပါသည်။ အလွယ်တကူ မှတ်သားနိုင်မည်ဟု ယူဆပါသည်။

အနှံသန္ဓေ စတင်ဖြစ်ပေါ်သည့်အချိန်သည်လည်း နိုက်ထရိုဂျင်အာဟာရကို စပါးပင်က ရရှိဖို့လိုအပ်သည့် အရေးပါသောအဆင့်ပင်ဖြစ်ပါသည်။ စပါးအနှံတွေ (တစ်နည်း) စပါးစေ့တွေအတွက် အနှံခက်ကလေးတွေ စတင်ဖြစ်ထွန်းသည့်အချိန် ဖြစ်သည်။ ဒီအချိန်မှာ နိုက်ထရိုဂျင်အာဟာရကိုလုံလောက်စွာမရရှိလျှင် တစ်နှံမှာပါဝင်သောအစေ့တွေ နည်းသွားမှာဖြစ်ပြီး စပါးအထွက်လည်း နည်းစေမှာဖြစ်ပါသည်။အနှံသန္ဓေ စတင်ဖြစ်ပေါ်သည့်အချိန်ကို အပြင်ပန်းအားဖြင့် အင်မတန်သိရန် ခက်ခဲသောကြောင့် မေးမြန်းလာပါသည်။

အနှံသန္ဓေ စတင်ဖြစ်ပေါ်တဲ့အချိန်ကို ဘယ်လိုသိနိုင်မှာလဲအနှံသန္ဓေ စတင်ဖြစ်ပေါ်သည့်အချိန်ကို သိဖို့ဆိုလျှင် မိမိစိုက်သည့် စပါးမျိုး၏စိုက်ခင်းထဲမှာရှိနေမည့် ရက်ပေါင်းကို ခန့်မှန်းတတ်ဖို့လိုမှာ ဖြစ်သည်။ စိုက်ခင်းထဲမှာရှိနေမည့် ရက်ပေါင်းကို ခန့်မှန်းဖို့ဆိုလျှင်
မိမိစိုက်သည့် စပါးမျိုး၏ အသက်ရက်ကိုရှေးဦးစွာသိဖို့ လိုမှာဖြစ်ပါသည်။ထို့ပြင် မိမိသည် စပါးစိုက်ရာတွင်ဘယ်စနစ်ကို အသုံးပြုခဲ့လဲ၊ ပျိုးထောင်ကောက်စိုက်စနစ်လား၊ တိုက်ရိုက်မျိုးစေ့ချ(ကြဲပက်) စိုက်တာလား စသည်အပေါ်လည်း မူတည်ပါသည်။

လယ်သမားကြီးကိုအသေးစိတ်ရှင်းပြကာ လိုရင်းအဓိကအချက်ကို ပြောပြလိုက်ပါသည်။"ကျွန်တော်တို့နိုင်ငံလို အပူပိုင်းဒေသတွေမှာ အနှံသန္ဓေ စတင်ဖြစ်ပေါ်တဲ့အချိန်ဟာ စပါးမရိတ်မီ ရက် ၆၀ အလိုဖြစ်ပါတယ်။ အဲဒီအချိန်ဟာ နိုက်ထရိုဂျင်အာဟာရကျွေးပေးဖို့ သင့်တော်တဲ့အချိန်ဖြစ်ပါတယ်။သို့သော် နိုက်ထရိုဂျင်အာဟာရမြေသြဇာ ကျွေးရမည့်အချိန်သည် ပျိုးထောင်ကောက်စိုက်စနစ်နှင့် တိုက်ရိုက်မျိုးစေ့ချ (ကြဲပက်) စနစ်တို့ ကွာခြားပါသည်။

ပျိုးထောင်ကောက်စိုက်စနစ်ဖြင့် စိုက်ပျိုးသည့်စပါးခင်းမှာ နိုက်ထရိုဂျင်မြေသြဇာ
ကျွေးသင့်သည့်အချိန်ကို တွက်ချက်ရာတွင်စိုက်ခင်းထဲမှာရှိနေမည့် ရက်ပါင်းကို သိနိုင်ရန် ပျိုးသက်ကို နုတ်ပယ်ပစ်ရမှာဖြစ်ပါသည်။စိုက်သည့်စပါးမျိုးက အသက်ရက်၁၃၅ ရက်၊ ပျိုးသက် ၂၅ ရက်ဖြင့် စိုက်သည်ဆိုပါစို့။ ထိုသို့ဆိုလျှင် ရိတ်သိမ်းခြင်းမပြုမီရက်ပါင်း ၁၁၀ သာစိုက်ခင်းထဲမှာရှိနေမှာဖြစ်ပါသည်။ ကောက်စိုက်ပြီးသည်မှ ရိတ်သိမ်းသည်အထိ ရက်ပေါင်း ၁၁၀ ထဲကနေ ရက် ၆၀ကိုနုတ်လျှင် စိုက်ပြီး ရက် ၅၀ သည် အနှံသန္ဓေစတင်ဖြစ်ပေါ်တဲ့အချိန် ဖြစ်ပါသည်။ထိုအချိန်သည် နိုက်ထရိုဂျင်မြေသြဇာကျွေးရန် သင့်လျော်သောအချိန်လို့ သိနိုင်မှာဖြစ်ပါသည်။

စပါးတိုက်ရိုက်မျိုးစေ့ချ (ကြဲပက်) စိုက်ခင်းဆိုလျှင်တော့ တစ်မျိုးဖြစ်သည်။ စိုက်သည့်စပါးမျိုး၏ အသက်ရက်ကိုသာသိရန်လိုသည်။ မျိုးစေ့မြေကျသည်နှင့် ထို
စပါးမျိုး၏ သက်တမ်း စသည်ဖြစ်ရာ စိုက်ခင်းထဲတွင်ရှိနေမည့် ရက်ပေါင်းမှာလည်း
စပါးမျိုး၏ အသက်ရက်နှင့်အတူတူပင် ဖြစ်ပါသည်။တွက်ချက်နည်းမှာ သက်တမ်း ၁၃၅ရက်ရှိသည့် စပါးမျိုးကို မျိုးစေ့ချ (ကြဲပက်)စိုက်ပျိုးသည်ဆိုပါစို့။ မျိုးစေ့ချသည့်နေ့မှသို့မဟုတ် ကြဲပက်စိုက်သည့်နေ့မှ ရိတ်သိမ်းသည်အထိ ၁၃၅ ရက်ထဲကနေ ရက် ၆၀ ကိုနုတ်လျှင် မျိုးစေ့ချပြီး ၇၅ ရက်သည် အနှံသန္ဓေစတင်ဖြစ်ပေါ်သည့်အချိန် ဖြစ်သည်။

ဤသို့ဖြင့် နိုက်ထရိုဂျင်မြေသြဇာကျွေးရမည့် သင့်လျော်သောအချိန်ကို သိနိုင်မည်
ဖြစ်ပါသည်။စပါးပင်၏ အပင်ပွားစီးသည့်အဆင့်တွင်တစ်ကြိမ်နှင့် အနှံသန္ဓေစတင်ဖြစ်ပေါ်သည့်အချိန်တွင်တစ်ကြိမ် စုစုပေါင်း နှစ်ကြိမ် နိုက်ထရိုဂျင်အာဟာရကျွေးပေးခြင်းသည် လိုအပ်သည့်အချိန်မှာ လိုအပ်သောအာဟာရကို ကျွေးပေးတာဖြစ်၍ မှန်ကန်သော အာဟာရဖြည့်တင်းပေးမှုလို့ ဆိုရပါမည်။ သို့သော် ကျွေးပေးသည့်နိုက်ထရိုဂျင်
မြေသြဇာ၏ အကျိုးထိရောက်မှုရှိစေရန်လယ်မြေ၏ မြေဆီလွှာအနေအထားနှင့် စပါးပင်၏ အခြေအနေပေါ်မူတည်ပြီး လိုအပ်သောပမာဏကို ကျွေးပေးရန်ဖြစ်ပါသည်။

မောင်ဖူး၀ေ (တောင်တွင်းကြီး)
#တောင်သူဦးကြီး_taungthuoogyi