🌾စပါး အခြောက် တိုက်ရိုက်မျိုးစေ့ချ
စိုက်ပျိုးနည်း🌾
မိုးနည်းရေရှားဒေသများ နှင့် ဆည်ရေမလုံလောက်သည့်ဒေသများတွင် စပါးစိုက်ပျိုးထုတ်လုပ် နိုင်ရန် နည်းပညာတစ်ရပ်ဖြစ်သည့် စပါး အခြောက် တိုက်ရိုက်မျိုးစေ့ချ စိုက်ပျိုးနည်း အကြောင်း ရေးသားတင်ပြအပ်ပါသည်။
ပထမဆုံး စိုက်ပျိုးသင့်သည့်မျိုးကိုအရင်စဉ်းစားရပါမည်။ ရွေးချယ်သောမျိုးသည် သက်တမ်းတို၊ အရည်အသွေးကောင်းမျိုး၊ ရေအနည်းလို၊ ရေငတ်ခံမျိုးများဖြစ်ရပါမည်။ သက်တမ်း (၈၀ - ၁၀၀) ရှိ အထွက်ကောင်းမျိုးများကိုရွေးချယ်ရပါမည်။
စပါး အခြောက် တိုက်ရိုက်မျိုးစေ့ချ စိုက်ပျိုးခြင်းအတွက်မြေအစိုဓာတ်သင့်တင့်စွာရှိချိန်တွင် မြေပြင်ရမှာဖြစ်ပါသည်။ နွားထည်နှစ်စပ်(သို့မဟုတ်)၁၆သွားထွန်နှင့်နှစ်စပ်ထွန်ပါ။ ထယ်ရေးနက်နက် နှင့်ထွန်ရေးညက်နေအောင်ထယ်စာခဲမွအောင်ထွန်ပါ။ မြေပြုပြင်ချိန်တွင်တီစူပါအိတ်ဝက်နှင့် ဂျစ်ပဆမ် နှစ်အိတ်ထည့်ပြီးမွှေပေးပါ။ မြေအစိုဓာတ်ကောင်းအောင်မြေမပြင်မီ ကောက်ရိုး၊နှမ်းရိုး ၊စပါးခွံများရှိလျှင် ထည့်ပေးပြီးဆွေးမြေ့အောင်ထားပေးပါ။ သီးနှံအကြွင်းအကျန်များရှိလျှင်မြေဆွေးပြုလုပ်ပြီးထည့်ပေးပါ။
မြေမွနေအောင်ညက်သွားပါကအစိုဓာတ်ထိန်းနိုင်စေရန်ကြမ်းတုံးရိုက်ပြီးမြေကိုညှိပေးပါ။ ပြီးလျှင် ဒုတိယအကြိမ်ထွန်တစ်စပ်ထပ်မွှေ၍ ကြမ်းတုံးထပ်မံရိုက်ပေးပါ။ မြေညှိပေးပါ။ ညှိထားသောမြေပေါ် တွင်၈လက်မခြားထွန်သွားတပ်နွားထွန်ဖြင့်စိုက်ကြောင်းများဖြောင့်နေအောင်ဆွဲပါ။ စိုက်ကြောင်းအနက် (၁-၂)လက်မခန့်သာနက်စေရန်သတိပြုပေးပါ။
တစ်ဧကအတွက်မျိုးစေ့ တစ်တင်းခွဲ- နှစ်တင်းနှုန်းအသုံးပြုပါ။ စပါးကိုရေစိမ် အညှောင့်ဖောက်ရန် မလိုပါ။ မြေအခြောက် မျိုးစပါးအခြောက်စိုက်ပျိုးရသည့်စနစ်ဖြစ်ပါသည်။ မြေပြုပြင်ပြီးပါက စပါးမျိုးစေ့ များကိုစိုက်ကြောင်းများတစ်လျှောက်တစ်နေရာနှင့်တစ်နေရာ (၈-၉ )လက်မခန့်ခွာ၍ တစ်နေရာလျှင် စပါး(၂-၃)စေ့နှုန်းလူဖြင့်လိုက်ချပေးရပါမည်။ ပြီးလျှင်မျိုးစေ့များမြေအတွင်းဖုံးသွားစေရန်ညီညာအောင် ကြမ်းရိုက်ဖုန်းပေးပါ။
ထိုသို့ဆောင်ရွက်ထားပြီးအစိုဓာတ်အနည်းငယ်ရသည်နှင့်ထွန်ရေးထယ်ရေး အခြောက်မှာပင် စပါးစေ့များအပင်ပေါက်၍ စပါးပင်များအတန်းလိုက်စိမ်းစိုလာပါမည်။ အပင်ပေါက်ပြီး၃ပတ်သားခန့်တွင် ပေါင်းလိုက်ခြင်းလုပ်ဆောင်ပေးရပါမည်။ စပါးအတန်းကြားအတွင်း ကြားလိုက်နွားထွန်ဖြင့်ပေါင်းမြက် နှိမ်နင်းခြင်းဖြင့်ပေါင်းလည်းသေ မြေလည်းထပ်ဆွပြီးသားဖြစ်စေပါသည်။ ပေါင်းမြက်များလွန်းလျှင် ပေါင်းသတ်ဆေးတစ်မျိုးမျိုးကိုအသုံးပြုရပါမည်။ ပေါင်းကိုစပါးအပင်ပေါက်ပြီး(၃၅)ရက်ခန့်အတွင်း အပြီး နှိမ်နင်းပေးရပါမည်။
ပေါင်းမြက်နှိမ်နင်းပြီးပါက ဒုတိယအကြိမ်မြေဩဇာကျွေးခြင်းကိုအပင်ပွားစည်းချိန်တွင် တစ်ဧက ယူရီးယားအိတ်တစ်ဝက်နှင့် ပိုတက်ရှ်အိတ်တစ်စိပ် ထည့်ပေးရပါမည်။ တတိယအကြိမ်မြေဩဇာ ကျွေး ခြင်းကို စပါးမှို့ကပ်ချိန်တွင် တစ်ဧက ယူရီးယားအိတ်တစ်ဝက်နှင့် ပိုတက်ရှ်အိတ်တစ်စိပ် ထည့်ပေးရပါ မည်။ ရေချိန်နိုင်ပါက အပင်ကြီးထွားချိန်တွင် မြေအစိုဓာတ်ရှိရုံရေစပ်စပ်သွင်းပေးနိုင်ပါသည်။ မိုးရွာလျှင် မိုးဦးရေမဆုံးရှုံးစေရန်ကန်သင်းလုံနေအောင်ဂရုတစိုက်ဆောင်ရွက်ထားရပါမည်။ မိုးရေအနည်းငယ်ရ လျှင်ပင် စပါးပင်ရှင်သန်ကြီးထွားနိုင်ပါသည်။ အပင်သက်တမ်းတစ်လျှောက် ပိုးမွှားရောဂါကင်းစင်အောင် လည်းဂရုတစိုက်ကာကွယ်နှိမ်နင်းရမည်ဖြစ်ပါတော့သည်။
Sources - အောင်ဆန်း(စိုက်ပျိုးရေး)
#တောင်သူဦးကြီး_taungthuoogyi
Comments
Post a Comment