နွေစပါးသီးနှံတွင် ကျရောက်သော ဖြုတ်ညို ပိုးမွှားများကို ကာကွယ်နှိမ်နင်းခြင်း
ဘယ်သီးနှံမဆို ပိုးမွှားကျရောက်လာပြီဆိုလျှင် အထွက်နှုန်းလျော့ကျသွားစမြဲဖြစ်ပါသည်။ နွေစပါးသီးနှံတွင် ကျရောက်သော ပိုးမွှားများ နှင့် ရောဂါများမှာ လေ၊ ရေ၊ မြေ၊ မျိုးစေ့၊ ရောဂါကျ အပင်အစိတ်အပိုင်းများ၊ လူ၊ တိရစ္ဆာန် နှင့် အသုံးပြုဆက်စပ်ပစ္စည်းများမှ ကူးစက်ခြင်းဖြစ်စေပါသည်။ ထိုပိုးများသည် မြေကြီး၊ အပင်နားနေသော အမြစ်ကဲ့သို့ အစိတ်အပိုင်းများ၊ ပေါင်းမြက်များ၊ ရောဂါရ အပင်အကြွင်းအကျန်များ စသည်တို့၌ ခိုအောင်းနေနိုင်ပါသည်။
နွေစပါးသီးနှံတွင် ကျရောက်တတ်သော ပိုးမွှားများကို နှိမ်နင်းရာဝယ် ကင်းထောက်စစ်ဆေးခြင်း၊ မီးထောင်ခြောက်ပြုလုပ် ထွန်းထားခြင်း၊ ဥမြုံများကို လက်ဖြင့် ဖယ်ရှားခြင်း၊ ပင်ကြွင်းပင်ကျန်များကို ဖယ်ရှားခြင်း၊ သီးလှည့်စိုက်ပျိုးခြင်း အစရှိသည်တို့ကို ပြုလုပ်ပေးရမည်ဖြစ်သည်။
နွေစပါးတွင် အဓိကကျရောက်တတ်သော ဖြုတ်ညိုမှာ ပျိုးခင်းမှ အနှံစတင်ချိန်ထိ ကျရောက်နိုင်ပြီး ပင်ပွားထွက်ချိန်နှင့် အနှံစတင်ချိန်မှာ ပိုမို ဖျက်စီးတတ်ပါသည်။ စပါးပင်ခြေ ရေစပ်နားမှာ နေထိုင် စားသောက်လေ့ရှိပါသည်။ ဖြုတ်ညိုကျရောက်ပြီ ဆိုလျှင် ဖြုတ်လောင်ရောဂါကို ဖြစ်စေပြီး ဗိုင်းရပ်စ်ကူးစက်စေ နိုင်ပါသည်။
ဖြုတ်ညိုမကျရောက်စေဖို့အတွက် ရှောင်ကြ ်ဥ ရမည် များမှာ မျိုးစေ့နှုန်းပိုသုံးခြင်း၊ အပင်စိပ်စိပ်စိုက် ခြင်း၊ ပတ်ဝန်းကျင်စိုက်ခင်းများထက် ရက်များစွာနောက်ကျ၍ စိုက်ပျိုးခြင်းတို့ဖြစ်သည်။
N မြေဩဇာတစ်မျိုးတည်းမသုံးပဲ ပိုတက်ရှ် မြေဩဇာကိုပါ အသုံးပြုပေးရမည်။ ပင်ပွားထွက်ပြီး ရေသွင်းရေထုတ် တစ်လှည့်ဆီ ပြုလုပ်ပေးရမည်ဖြစ်သည်။ စပါးပင်အောက်တွင် ဖြုတ်ညိုများရှိမရှိ တစ်ပတ်တစ်ခေါက် အနည်းဆုံးစစ်ဆေးပေးရမည်။ ဖြုတ်ညိုကိုတွေ့လျှင် အရင်ဆုံးရေထုတ်ရမည်ဖြစ်ပြီး လေကြောင်းခွဲပေးရမည်ဖြစ်သည်။ စပါးရုံတစ်ရုံတွင် ဖြတ် (၁၀-၁၅) ကောင်နှင့် အထက်တွေ့မှသာ ပင်လုံးပြန့်အာနိသင်ရှိသော ပိုးသတ်ဆေး တစ်မျိုးမျိုးကို သုံးပေးပါ။ ထိသေ/ စားသေ ပိုးသတ်ဆေး တစ်မျိုးကို သုံးမည်ဆိုပါက ဖြုတ်ညိုကို တိုက်ရိုက်ထိစေရန် အပင်အောက်ခြေထိ ရောက်အောင် ဆေးဖျန်းပေးရမည်။
#တောင်သူဦးကြီး_Taungthuoogyi
Comments
Post a Comment