စပါးခင်း/ ပဲခင်းတွေ ရိတ်သိမ်းပြီးလို့ ကျန်ခဲ့တဲ့ ကောက်ရိုး/ ပဲရိုးတွေထဲမှာ ဘယ်လိုအာဟာရဓာတ်တွေ အဓိက ကျန်နေမလဲ။
တချို့တောင်သူတွေဆိုရင် ဘယ်သီးနှံမှာ ဘာဓာတ်က ဘယ်လောက်ရာခိုင်နှုန်းဆိုပြီး ဇယားတွေနဲ့ပါ ပြတာကို အားရစရာ တွေ့ရှိရပါတယ်။ တချို့လည်း ကောက်ရိုး/ ပဲရိုးတွေကို လယ်ကွက်အနှံ့ဖြန့်တယ်ဆိုတာကို ဝမ်းသာစရာ တွေ့ရပါတယ်။ တချို့ကေမန့်တွေမှာတော့ ဖျက်ပိုး/ ရောဂါကျတာမို့လို့ အာဟာရဓာတ်တွေ ပါဝင်နေတာကို သိလည်းပဲ မတတ်နိုင်ဘဲ မီးရှို့ရမှာဆိုတာကို ဖတ်လိုက်ရပါတယ်။
ဒီနေ့ရဲ့ အဓိကရည်ရွယ်ချက်ဖြစ်တဲ့ ကောက်ရိုး/ပဲရိုးထဲ အဓိကကျန်နေသေးတဲ့ အာဟာရဓာတ်တွေအကြောင်း ပြောရမယ်ဆိုရင်တော့ အများကြီးပါပဲ။ ဒါပေမဲ့ မှတ်ရလွယ်အောင် လိုတိုရှင်း ပြောရရင် ကောက်ရိုး/ပဲရိုးတွေထဲမှာ မိတ်ဆွေတို့ သီးနှံရာသီတိုင်း သေချာတွက်ချက်ပြီး ဝယ်သုံးနေရတဲ့ အများလို အာဟာရဓာတ် (၃) မျိုးလုံး ပါနေပါတယ်။
**အများလို အာဟာရဓာတ် (၃) မျိုးက ဘယ်လောက်စီ ပါတာလဲ?** လို့ တွေးနေမိပြီလား…
တစ်ဧကလယ်ကွက်ကနေ ထွက်လာတဲ့ **ကောက်ရိုး**တွေမှာဆိုရင် **ပုလဲ (၁၉) ပြည်၊ တီစူပါ (၂) ပြည်၊ ၊ပိုတက်ရှ် (၂၂) ပြည်ခန့်**
**ပဲရိုး/ပဲမှော်**တွေထဲမှာလည်းပဲ **ပုလဲ (၁၆) ပြည်၊ တီစူပါ (၆) ပြည်၊ ၊ပိုတက်ရှ် (၂၂) ပြည်ခန့်** ပါဝင်နေပါတယ်။
ဒီပါဝင်မှု နှုန်းထားတွေကို သေချာကြည့်မယ်ဆိုရင် ကောက်ရိုး/ပဲရိုးထဲမှာ အပင်တွေ ကျန်းမာကြံ့ခိုင်ဖို့ အဓိက လိုအပ်တဲ့ ပိုတက်စီယမ်ဓာတ်က အများဆုံးပါဝင်နေတာကို တွေ့ရမှာပါ။ ဒီပိုတက်စီယမ်ဓာတ်တွေကိုသာ ပြန်ထည့်နိုင်မယ်ဆိုရင် မိတ်ဆွေတို့နောက်စိုက်မယ့် စပါးပင်တွေရဲ့ တောင့်တင်းခိုင်မာမှုအတွက် အထိုက်အလျောက်အားဖြည့်နိုင်မှာဖြစ်လို့ ပိုးမွှားရောဂါကျရောက်မှုကိုလည်း မဖြစ်ခင်ကတည်းက ကြိုတင်ကာကွယ်ပြီးသား ဖြစ်နေမှာပဲပေါ့။ ဒါကြောင့် လာမယ့် မိုးစပါးမှာ ရာသီမစခင်ကတည်းက ခြေတစ်လှမ်း၊ နှာတစ်ဖျားသာနေစေဖို့ လယ်ယာထဲက ထွက်ရှိလာတဲ့ ကောက်ရိုး/ပဲရိုး/ပဲမှော်/ရိုးပြတ်တွေကို လယ်ထဲပြန်ထည့်ပေးကြဖို့ တိုက်တွန်းလိုပါတယ် (ဖျက်ပိုး/ရောဂါဆိုးရွားစွာ ကျရောက်ခဲ့သော စိုက်ခင်းမှ ကောက်ရိုး/ပဲရိုးများမပါ။)
မူရင်း-ရေတံခွန်
Comments
Post a Comment